Albisteak

 

Tokiko Turismo Bulegoa Bezero mistoaren metodologiaren arabera ebaluatu da, sektore bakoitza bezeroaren erabateko gogobetetzera bideratzen duten Jardunbide Egokien Eskuliburuen betetze-maila ezagutzeko.

Batez besteko balorazio orokorra 100etik 97,5 puntukoa da, eta 2017ko azken ebaluazioa bost puntutan gainditu da; horrek esan nahi du bilakaera positiboa izan dela. Bertan, Basquetour Turismoaren Euskal Agentziako auditoreak jendaurreko arretari lotutako 13 alderdi ebaluatu ditu. Horietatik 11tan puntuazio gorena lortu du udal erakundeak.

Azterlan horrek emaitza oso onak eman ditu, eta zerbitzuaren kalitate-estandarrak oso ondo bete dira. Bertan, lokalaren instalazioari lotutako hainbat dimentsio ebaluatu eta neurtu dira (sarbideak eta kanpoko irudia, segurtasuna eta mantentze-lanak), lege-betekizunak eta bezeroari helmugari buruz emandako informazioa ebaluatu dira, bai eta zerbitzua ematen duten langileen balorazioa ere.

Hobetu beharreko arlo gisa, zerbitzua ematean teknologia berritzaileen erabilera areagotzeko beharra aipatzen du txostenak.

Txosten hori beste errekonozimendu bat da udal turismo sailarentzat. Sail hau 2005ean hasi zen zerbitzuaren kudeaketa hobetzen, eta Turismoaren Kalitateko "Q" a lortu duen Euskadiko lehen bulegoetako bat izan da. Ondoren, Turismo Bulegoak Bikaintasunarekiko Konpromisoaren Diploma lortu zuen, Euskalitek 2016an emandakoa, eta haren kudeaketan udalerriaren ikuspegi estrategiko turistiko globala sartzea ahalbidetu zuen.

Zer da Mystery Shopper?

Mystery Shopper edo Bezero misteriotsuaren teknika behaketa-ikerketarako metodologia bat da, erakunde edo enpresa batek eskaintzen dituen zerbitzuen kalitatea ikuskatu eta aztertzeko aukera ematen duena. Metodologia horretan, benetako bezero batek egingo lukeen moduan jarduten duten eragile batzuek parte hartzen dute, produktuen eta zerbitzuen ezaugarriak modu anonimoan aztertuz eta ebaluatuz, aldez aurretik ezarritako kalitate-estandar batzuen arabera.

Teknika hori, funtsean, "TOUCH points" edo harremanetarako puntuetan eta "moments of truth" edo "egiaren uneak" izenekoetan zentratzen da, hau da, bezeroek produktuekin eta erakundeko langileekin harreman zuzena duten puntu eta uneetan.